Os conzellos no aturan de fer bandos reiterando a los vezíns qu’han d’estremar as precauzións deván d’a grave situazión chenerada por o preocupán, e importán, aumento de causos de Covid.
No podemos fer riunións sozials, se clama a la responsabilidat d’os confinaus por contacto con positivos u se nos recuerda que ye preziso cumplir con os confinamientos perimetrals. Tan y mientres, siento, leigo y mesmamén veigo que siguen fendo-sen fiestas ilegals, manifestazións negazionistas, peñas con presonal, no sólo que choven, en muitos lugars u roldes con muitos zagals y zagalas, sin d’o bozo puesto, en os arredols d’os institutos d’educazión secundaria. Fa falta, ye tristo pero asinas ye, más pedagochía a chicos y chacos.

De vez, en lugars como Utriellas, se solizita refuerze umán ta lo zentro de salut an s’han puesto fer dica 100 prebas PCR en un día y an se’n reyaliza o clamau «mac auto» que premite fer as prebas drento d’os autos, Prezisamén en Cuencas Mineras, Chunta Aragonesista solizitó mesuras pa mirar de paliar o numero de positivos abius en a zona de salut d’Utriellas.

A tot remate, lo que en CHA consideramos impreszindible, ye fer cumplir as normas propuestas, y aprebatas. Si pa cumplir as normas se prezisan más rondas de ficanzia por arredols d’institutos, más que más en orarios de recreyo y zonas de peñas u atros locals sozials, pos se fan. Y tot isto no por afaño recaudatorio sino por nezesidat de que la pasia no contine espardindo-se en as nuestras comarcas.

Amás, dende os Conzellos no se debe premitir que s’organizen fiestas y s’ha de controlar que no se`n faigan. A toz nos cuaca ir «de bureo» pero a situazión, actualmén, no lo premite. Millor ye tener muitas fiestas en o futuro por no fer-lo agora que ir-me-ne uei y no poder en o esdevenidero.
Vocabulario: Conzello (Ayuntamiento), tristo (triste), fer (hacer), causo (caso), tan y mientres (mientras tanto), siento-leigo-veigo (oigo-leo-veo), refuerze umán (refuerzo humano), ficanzia (atención, vigilancia), an (donde), puesto (podido), dica (hasta), a tot remate (en todo caso), recreyo (recreo), espardir (propagar), leito (cama), ye (es). Utriellas (Utrillas).

Marco Negredo – CHA Cuencas Mineras