Tristura, melancolía, desaspero, murria, escureldat, ezt., son alchetivos que despresan o estato d’animo d’as chens d’as redoladas mineras aragonesas. Dezagas quedan vagas (huelgas) d’os treballadors d’os seutors minero y eleutrico, manifestazións y marchas. Luitas t’aconseguir muito más y que deseyamos que no haigan siu en valde.
Dimpués de tanta luita, de fablar con un buen numero d’interpresas ta que se fiquen en o territorio, de zentrar-nos, os compañers de CHA, en o futuro, an debeban aber treballato tamién a resta de partius y no sólo que por o carbón, nos trobamos con a Zentral d’Andorra zarrada y con minas albandonadas. Con muitas familias qu’abrán de buscar o bollo, si no s’apaña tot isto, difuera d’o suyo lugar.
Y si güellamos enta Aliaga, Escatrón u Escucha, an ya zarraron as suyas zentrals, u ta lugars an tamién s’albandonón as suyas minas en redoladas como Baixo Zinca, Comunidat de Teuel, Cuencas Mineras, Mayestrazgo u Baixo Aragón, aquers lugars han perdiu gran parte d’a suya poblazión en sólo que 30 añadas. ¿S’escapará Andorra y redolada d’ixe remate?
O presidén Lambán «asegura» que lo emplego no tardará en rechitar en Andorra y diz valurar más as eniziativas futuras que la calendata d’o zierre d’a Zentral». O problema, a duda, radica en que o zierre ya ye una reyalidat y as eniziativas futuras no han plegau en tiempo y forma.
En CHA, siempre hemos demandau un futuro sostenible ta las comarcas mineras asinas como mesuras chustas ta que la chen d’aquí pueda quedar-se en a redolada. Si bi plegan ixos treballos que no sigan «pan ta uei y fambre ta maitín», mantienendo a la chen d’o terreno, a nuestra tristura, melancolía, desaspero, murria y escureldat, pasarán a estar goyo, ilusión, muita fervor, asperanza, brilo y, más que más, motivazión ta continar luitando, con RASMIA, por as nuestras redoladas. As nuestras ganas son todas de cambear, ta bien, os alchetivos d’opinanza, d’animo.
Marco Negredo – CHA (Andorra)
